على اجروحك غفت ابليل الهموم
وتلكاك الصبح.بالهم يوعيك
اذا راد الفرح يتسامر وياك
يلم حزن الوكت كله ويبجيك
تعلم بيك وكتك..يزرع احزان
وكبل وردك..يحصدك مايخليك
عماك وخله عينك.متر متشوف
وتظم روحك..اذا صاحب يلاكيك
يرد بيك التعب..وافراشك الكاع
ويكص بيك..البرد محد يغطيك
على اجروحك..مشت السجاجين
تكص منك..لحم واعظام ترميك
فقير ودمعتك..مو مثل الدموع
ولا من تبجي..دمعاتك تسليك
الفقر مو عيب..لكن يشده البال
ويخلي الناس..بسمك ما تسميك
نعم ترتاح..اذا تاجر وشبعان
ونعم يكتل..اذا جوعانك يوازيك
غناة النفس.. اعظم من غنى المال
وضل نفسك ابيه وكلشي يرضيك
ماكو انسان يكتب رزق لانسان
اذا رب الرش..ما راد ينطيك
ولو دنياك عكرب..مالها اعيون
تكتلك وبذنب غيرك..تداعيك
انصحك لا تطخ..راسك للايام
ولا ايدك تمدها..اشما قست بيك